თამარ კიკნაძე

თამარ კიკნაძე BLC-ის იურისტია. მისი პრაქტიკის ფოკუსი ფინანსური მომსახურების რეგულირება და ფინტექის სექტორია. თამარი საგადახდო მომსახურების პროვაიდერებს, ვირტუალური აქტივების მომსახურების პროვაიდერებსა და ფინანსური ბაზრის სხვა მონაწილეებს საქართველოს ეროვნულ ბანკთან ურთიერთობის ყველა ეტაპზე ეხმარება. ეს მოიცავს რეგისტრაციასა და ლიცენზირებას, მოთხოვნების მიმდინარე შესრულებას, ზედამხედველთან კორესპონდენციასა და ინსპექტირებას.

თამარის პრაქტიკა მარეგულირებელ და ტრანზაქციულ მიმართულებებს აერთიანებს. ის ამზადებს ფულის გათეთრებისა და ტერორიზმის დაფინანსების წინააღმდეგ ბრძოლის (AML/CFT) პოლიტიკებს, პროდუქტების აღწერილობებსა და კომპლაიანსის ჩარჩოებს, რომლებსაც რეგისტრაციისა და ლიცენზირების განაცხადები ეფუძნება. ასევე ეხმარება კლიენტებს მარეგულირებლის შენიშვნების ყოველ რაუნდზე მუშაობისას. ტრანზაქციულ მიმართულებაში ის ადგენს კომერციულ, ფინტექ და პერსონალურ მონაცემთა დაცვის ხელშეკრულებებს და აწარმოებს მოლაპარაკებებს. გარდა ამისა, კონსულტაციას უწევს კლიენტებს კორპორაციული მართვის, რესტრუქტურიზაციისა და კაპიტალის ბაზრის საკითხებზე, მათ შორის ობლიგაციების ემისიაზე. თამარი თავისუფლად მუშაობს ქართულ, ინგლისურ და რუსულ ენებზე და საერთაშორისო კლიენტებისთვის რეგულარულად ამზადებს ორენოვან მარეგულირებელ და ტრანზაქციულ დოკუმენტაციას.

თამარი რეგულირებად სექტორს შიგნიდან იცნობს. BLC-მდე ის საგადახდო მომსახურების პროვაიდერის შიდა იურისტი იყო. იქ უშუალოდ ნახა, როგორ მოქმედებს მარეგულირებელი მოთხოვნები ზედამხედველობის ქვეშ მყოფი დაწესებულების ყოველდღიურ საქმიანობაში. ამიტომ მისი რჩევა სამართლებრივად გამართულიცაა და პრაქტიკაში განსახორციელებელიც. კარიერა საქართველოს ერთ-ერთ წამყვან იურიდიულ ფირმაში პარალეგალად დაიწყო.

თამარი აკადემიურ საქმიანობასა და დავების გადაწყვეტის სფეროშიც აქტიურად არის ჩართული. მან მონაწილეობა მიიღო შემდეგ საერთაშორისო შეჯიბრებებში: 21st ICC Mediation Competition, International ICC Cross-Examination Moot Competition, Central and Eastern European Moot Competition (CEEMC), Willem C. Vis International Commercial Arbitration Moot და Philip C. Jessup International Law Moot Court Competition. თამარი Willem C. Vis Moot-ის გუნდის მწვრთნელი იყო, ამჟამად კი Vis Moot-ის თბილისის პრე-მუთის (Vis Moot Tbilisi Pre-Moot) ორგანიზატორია.